Ang Nais Ko Pag Ako’y Umibig

Ako’y naghahanap ng iibigin ko

Na isang nilalang saan man sa mundo

Na pang-habang buhay na aking kasalo

Tag-ula’t tag-araw sa buhay na ito.

Iisa ang laman ng aming damdamin

Ng aming isipan, ng aming mithiin.

Lunggati sa buhay aming hahanapin

Na siya at ako’y laging mag-kapiling.

Isang tao siyang laging kaagapay

Sa gabi at araw siyang susubaybay,

At handang aliwin ang pusong may lumbay

Ng kanyang kabiyak; akong minamahal.

Makikinig siya sa tangi niyang irog

Sa laman ng dibdib na inihihimutok

Na lilimiin niya ng tunay at lubos

Upang ang layon ko’y maipag-kaloob.

Ngunit kung mali man itong aking layon

Sa mga nais ko’y hindi s’ya sangayon

Mag-papaliwanag siyang mahinahon.

Iintindihin ko itong kanyang tugon.

Pag ako’y umibig, ang tunay kong nais

Ay isang lalaking ang kanyang pag-ibig

Ay buhat sa puso na laman ng dibdib

Na daramahin ko maging hanggang langit.

Mag sasalo kami ng buong ligaya

Sa init ng aming pag-ibig, pagsinta

Pulot-gata itong wala maka-kapara

Kinasasabikan na aking madama.

Iibign ko siya’t aking mamahalin

At maaasahang siya ay gayon din

Hanggang sa lumubog at mag-takip-silim

Buhay na kaloob ng Diyos sa amin.

Pag natagpuan ko ang hanap kong iyan

Maging sino man si’ya’y ‘ di ko aalpasan

Pagkat ang pag-ibig ‘di lamang sa laman

Lalago’t uunlad ang pag-mamahalan

At kung lumipas na pag-ibig- simbuyo

Apoy ng damdaming kami ay nag-salo

At nalabi na ’lang ala-ala nito

Ang pag-mamahal ko’y hindi mag-babago.

At kung dumating na ang huling sandali

Bakas ng kahapon na lang ang nalabi

Di na kailangang na sa kanyang labi

“Iniibig kita” muling mamutawi.

Ngunit hanggang ngayon ako’y naghihintay’

Na sa aking buhay siya ay dumatal

Ipag-tapat niyang ako’y kanyang mahal

Ngunit hanggang ngayon, siya ay nasaan?

Composed by Jose Monzon on January 27, 2008